ВЕЛЕШАНИ СО ИСКИНАТА МРЕЖА
ФУДБАЛ - Втора лига, 28. коло
ПОБЕДА - БОРЕЦ 12-1 (7-1)
Победа немаше милост, се изнадава голови и со 12-1 го прегази немоќниот, млад гостински состав на Борец. Прилепчаните како одвај да чекаа старт на мечот да тргнат во вистинска агресија кон голманот Петровски.
Првата акција резултираше со гол, по центаршут одлево, кога во голема мешаница искусниот Благоја Гешоски најдобро се снајде во калта и со глава ја затресе мрежата за 1-0. По три минути игра веќе беше 2-0 со погодокот на Новче Ацески од 22 метри далечина. Се наѕираше катастрофата на велешани и по ударот над пречката на Гешоски.
Но, на изненадување на присутните, во 16. минута гостите намалија на 2-1. По центаршут одлево, топката беше префрлена на втората статива, каде втрча високиот стопер Стефан Додевски и непречен упати кон целта. Во тие минути Борец покажа заби и со остриот удар на Стојанов, кога Сркески одбрани.
Сепак, да нема дилеми околу конечниот исход, бргу се погрижи Гешоски со голови во 24 и 27 минута, а оттогаш натаму секој напад на домашните мирисаше на гол. Особено ангажирани беа прилепчаните по крилните позиции и видовме многу пробиви и центаршутеви. Брзиот шпиц Ицко Јанкоски со асистенции учествуваше во повеќето од головите, ја погоди пречката, но во тој период немаше можност да бие кон голот.
Гол - серијата ја продолжи Даниел Карчески, повторно погоди Ацески, а пред одморот во соло акција на 7-1 зголеми Даниел Котески.
Во вториот дел Гешоски само испружи нога и тоа беше доволно да го измами голманот за свој четврти гол, а до крајот во листата на стрелците се запишаа Ристе Илијовски од пенал, изнуден од Јанкоски, Игор Мирчески, Александар Чешелковски и конечно Јанкоски го запечати мечот на 12-1 рекорден триумф за Победа над Борец.
Игралиште Могила во Прилеп. Гледачи 300. Судија Стојанче Трпчевски (Кавадарци). Помошници Илија Гонев и Дејан Андов (Неготино). Делегат Љупчо Ристевски (Демир Хисар). Жолт картон Додевски (Б).
Стрелци Гешоски 1, 24, 27, 52, Ацески 3, 32, Карчески 28, Котески 45, Илијовски 65 - п, И. Мирчески 74, Чешелковски 77, Јанкоски 82 (П) - Додевски 16 (Б)
ПОБЕДА Сркески - В. Митревски, Ф. Мирчески, Милошески, Котески (46. Илијовски) - Мегленски, Крстески (46. Чешелковски), Ацески, Карчески (46. И. Мирчески) - Јанкоски, Гешоски.
(Клупа Талески, Богоески, Зојчески, Димитриоски)
Тренер Ј. Николоски.
БОРЕЦ Петровски - Петрушевски, Паневски, Додевски, Чоков - Петковски, Крстевски, Стојанов, Зендели - Митревски, Керим.
(Клупа Петрушев, Мецановски)
Тренер П. Нанев.