Ќе се обидам за сите посебно да дадам коментар кој ќе ги опфати квалитетот на услугата и односот кон потрошувачите, квалитетот на персоналот и нивната организираност, цените, разновидноста на асортиманот и да ги истакнам позитивните и негативните страни, бидејќи сите ги имаат.
Веро
Веро е во најголема предност со продажните објекти, но не со нивниот број, туку со нивната големина, среденост и хигиена. Убедливо најголем асортиман на производи, без разлика дали станува збор за прехрамбени артикли, козметика, средства за домаќинство...ова е многу битно, бидејќи една од најиритирачките работи за купувачот е кога џабе влегол и не ја комплетирал листата на потребни намирници, па мора потоа да се шета и до друг маркет за да го најде потребниот производ. Значи, скоро никогаш не ми се случило да излезам од Веро, а да не испазарам тоа што ми треба.
Персоналот е добро организиран, во доволен број, и точно се знае кој што работи. Касиерот е касиер, месарот е месар, редачот на роба е редач на роба. Љубезни се, културни, позитивни, претежно млади (нема теткици и бркати чикици), педантни и средени.
Слободно може да се каже дека Веро е еден од најскапите маркети. Пензионерите и оние кои го шетаат пола град за денар поефтино нека заборават на Веро.
Тинекс
Тинекс е маркет кој убедливо води според бројот на продажните места, но не се истакнува нешто посебно според нивната уреденост и изгледот. Не се истакнува ни според услугата на персоналот, ниту па според некои којзнае какви поволни цени. Слободно може да се каже дека политиката на Тинекс е "златна средина". Значи, се труди да држи некое пристојно ниво, но нема аспирации да прерасне во нешто повеќе. Нема којзнае колку асортиман, но сепак ги има сите секојдневни намирници, во доволен број. Нема којзнае каква услуга, но не е ни за критика. Тинекс е маркет за средната класа, баш онака - маркет за секој ден.
Скопски Пазар (Макси Д, СП Маркет)
Исто како и Тинекс, и овие спаѓаат во златната средина. За разлика од Тинекс, овие имаат аспирации да одат накај елитата, ама сиротите незнаат како. Безуспешно се обидуваат да глумат маалски Веро (почнаа да отвараат поголеми објекти, да ја реорганизираат шемата на персоналот, да прават промоции и акции), ама со полуписмен менаџмент и неписмени продавачи тешко им оди. Овие маркети се пример за хаос во услугата - продавачот е и касиер, и редач на роба, и чистач, и шеф. Е така богами не ја бива. Често се случува да се натегаат кој да седне на каса, а кој да му покаже на муштеријата каде е некој производ. Хаос ин лаос. Бидејќи пола од персоналот се во директни роднински врски со сопствениците и другите вработени во компанијата, а другата половина се вработени поради некој друг интерес, па и не можеш да очекуваш којзнае каква услуга.
Во поглед на асортиман се задоволително снабдени, но ништо екстра. Во поглед на цени се океј, не се лакомат многу.
Тедико
Не би трошел многу зборови. Селско маркетче. Од поефтинките, ама со најмал асортиман. По неколку видови од артикал, а многу артикли воопшто и ги нема. Претежно мали објекти, несредени, неуслужлив персонал (15 луѓе чекаат на една каса, 3 продавачи си прават муабет позади рафт и никој не седнува на втора каса да расчисти гужва). Во Тедико би купил само цигари. И пиво. Услуга? Што беше тоа... "Види таму на рафт негде..."
Кам
Бетер и од Тедико. Убедливо најмал асортиман (се некои чкљ фирми), ама се наоѓа и по некој добар и ефтин производ кој го нема во другите маркети. Пример, има убави и ефтинки кашкавалчиња, туни и слично кои самите ги увезуваат. Ама, онака - дупка жива. Ко да влегуваш во Центро или Славија пред распад на СФРЈ.