Дрвокрадците со стапици и секири против полицајците
Во Скопскиот Регион секојдневно се крадат по стотина кубни метри дрва. Најчеста цел се шумите на Скопска Црна Гора, пределот над Арачиново и Блаце, Китка и Караџица
Дефицитот на дрва на пазарот и зголемените цени на огревното дрво доведоа до пораст на зелениот криминал. Шумска мафија ги пустоши дрвјата низ планините. Секојдневно, само во Скопскиот Регион се крадат и по стотина кубни метри дрва. Најчеста цел на дрвокрадците се Скопска Црна Гора, пределот над Арачиново и Блаце, Китка и Караџица. Се сечат даб и бука, кои имаат највисока цена на пазарот и кои граѓаните ги користат за огрев.
Од Шумската полиција велат дека дрвокрадците организирано, дури и вооружени, ги пустошат планините, па често не можат соодветно да реагираат.
"Има дефицит од дрва на пазарот, а и цените во последниве неколку години се многу повисоки. Тоа уште толку $ отвора работа на т.н. шумска мафија. Според нашите можности реагираме, но не можеме 24 часа на ден да дежураме. Според Законот за шуми, на секој што нелегално врши сеча на дрвја му изрекуваме прекршочна пријава. Казната е 3.500 евра, која треба да се плати во рок од 7 дена. Правиме записник на терен и го испраќаме до Основниот суд во Скопје, кој ја продолжува постапката против прекршителот", велат од Шумската полиција за Скопскиот Регион.
Оттаму објаснуваат дека има два типа дрвокрадци, оние што сечат за сопствени потреби и препродавачи. Препродавачите, според нив, најчесто се организирани во групи од по десетина луѓе, доаѓаат на планините со камиони, со моторни пили и вооружени.
"Толку добро се организирани, што едни чуваат стража, други сечат, а трети ги транспортираат дрвата. Нивни луѓе имаат дури и пред зградата на Македонската телевизија каде што се нашите простории, па уште кога ќе тргнеме во патрола, нe следат и им јавуваат кон кој дел од Скопје се упатуваме. Ни прават стапици, поставуваат шајки на дрвени штици, ги покриваат со лисја и ги ставаат на патот за да ни се дупнат гумите на возилата и да не можеме да стигнеме до местото на кое тие пустошат. Додека ги замениме гумите или викнеме полиција, тие ќе си заминат", ни раскажаа вработените во Шумската полиција.
Освен со пречки на патот, проблеми имаат и кога ќе ги начекаат дрвокрадците на дело. Како што велат, физички ги напаѓаат, ги бркаат со секири и со моторни пили, бегаат по планината, па имало и такви случаи кога пукале по нив со пиштоли.
"Проблем е тоа што на терени кои се непристапни и далеку, одиме без полициска придружба. Наши колеги биле повредувани при физички пресметки. Лицата не сакаат да се легитимираат, па записникот го правиме врз основа на фотографии и потоа лицата ги ставаме на препознавање. Веќе и ги научивме, едни исти групи ги пустошат планини. Кога ќе ги фатиме крадците, освен дрвата, им ги одземаме и камионите, пилите и другата опрема што ја користат за сечење", додаваат од Шумската полиција. Велат дека често крадците ги вадат воланите од камионите за да не можат да им ги одземат и да ги симнат од планината. Запленетите дрва се носат во во ЈП "Македонски шуми", кои потоа ги продаваат, а возилата и опремата во Агенцијата за одземен имот.
Вработените во Шумската полиција објаснуваат дека голем проблем е тоа што не се доволно екипирани и опремени за да можат целосно да се справат со дрвокрадците. Располагаат само со две возила, што е малку за контрола на целиот Скопски Регион", кажуваат шумските полицајци. Како што велат, иста е состојбата и во другите региони. (А.Антевска)
Месечно се запленуваат по стотина кубици дрва
Според извештаите за работа, минатиот месец до Основниот суд се поднесени 18 пријави за нелегално сечење дрвја. Запленети се 11 камиони, 4 автомобили, трактор, десетина секири и моторни пили. Месечно се фаќаат по стотина кубни метри дрва, кои се исечени од дрвокрадци. Но, како што велат од Шумската полиција, количината на нелегално исечени дрва е многу поголема бидејќи голем е бројот на крадци што не се фатени.
Казна и за оној што купил дрва од див продавач
Според Законот за шуми, се казнуваат и оние граѓани што ќе купат дрва од диви продавачи. Шумската полиција врши контрола и кај граѓаните од каде ги купиле дрвата. Ако немаат документи од каде им се купени дрвата, им се одземаат и заработуваат казни.