Ме интересира колкава е процедурата, што се треба понатаму да се промени (изводи, дипломи и сл.), колку чини, колкав временски период, и што ако на пример во меѓувреме имам аплицирано за бугарски пасош, а променам име во Македонија, дали многу ќе се усложнат процедурите од таков тип?
Граѓанинот има право да го промени личното име, односно само името или презимето. На малолетно лице ќе му се промени личното име, односно само името или презимето на барање од родителите или посвоителите, односно на старателот со согласност од надлежниот орган за старателство. Ако се бара промена на личното име за дете кое наполнило 10 години живот, потребна е и негова согласност. Барањето за промена на личното име со потребната документација се поднесува до Министерството за внатрешни работи. Министерството за внатрешни работи донесува решение за промена на личното име во рок од 30 дена од денот на приемот на барањето за промена на личното име.Конечното решение за промена на личното име се доставува на органи и организации кои со закон се должни да водат евиденција со податоци за личното име на граѓанинот.Нема да му се одобри промена на личното име, односно само на името и презимето на лице против кое се води кривична постапка за кривично дело кое се гони по службена должност или на лице кое е осудено за такво кривично дело, додека казната не е извршена или додека траат правните последици на осудата, како и на лице кое не ги регулирало имотно-правните и други законски обврски од брачниот однос и од односот на родители и деца кон лица кои живеат во Република Македонија.Министерството за внатрешни работи во постапката на одлучување по барање за промена на личното име, по службена должност утврдува дали подносителот на барањето е осуден за кривично дело за кое се гони по службена должност.
Кон барањето се доставуваат следните докази:
- доказ за идентитет на подносителот (лична карта или патна исправа);
- уплатница за уредно наплатена административна такса во износ од 300.00 денари;
- согласност од малолетно дете за кое се бара промена на личното име доколку истото има наполнето 10 години;
- уредно полномошно доколку барањето за промена на личното име е поднесено преку полномошник;
- ако барањето за промена на личното име се однесува на малолетно дете барањето се поднесува од страна на двајцата родители, освен во случај на отсуство односно спреченост на едниот родител, кога може да се приложи изјава заверена на нотар или во дипломатско-конзуларните претставништва на Република Македонија во странство.
Документи кои треба да се достават:
- препис од Матична книга на родени заради обезбедување точни податоци односно споредување со евиденцијата на матичен број на подносителот на барањето (по службена должност).;
- уверение односно известување од надлежен суд дека за подносителот на барањето не се води кривична постапка за кривично дело за кое се гони по службена должност;
- уверение односно известување од надлежен центар за социјални работи дека подносителот на барањето ги има регулирано имотно-правни и други законски обврски што произлегуваат од брачниот однос и од односот на родители и деца кон лица кои живеат во Република Македонија (по службена должност).
Временски рок : 15 дена.