БРОЈОТ НА РАБОТНИЦИ ВО ИНДУСТРИЈАТА ПОГОЛЕМ ЗА 7,4%
Странските инвеститори стануваат најголеми работодавачи во Македонија
За скоро четири пати е зголемен бројот на работници во секторот за производство на моторни возила и приколки во првите шест месеци годинава, покажуваат податоците на Заводот за статистика. Ваквото зголемување на вработувањата се должи пред се на белгиската фабрика за производство на автобуси Ван Хул во индустриската зона Бунарџик
За скоро четири пати е зголемен бројот на работници во секторот за производство на моторни возила и приколки во првите шест месеци годинава, покажуваат податоците на Државниот завод за статистика. Само во јуни, споредено со јуни минатата година, бројот на работници кои работеле во производство на моторни возила е поголем за 325%. Согласно тоа, во првото полугодие вкупниот број на работници во индустријата е за 7,4% поголем, споредено со истиот период минатата година. Ваквото зголемување на вработувањата се должи пред се на белгиската фабрика за производство на автобуси Ван Хул, која од мај годинава официјално почна со работа во слободната зона Бунарџик 2.
Компанијата која што е еден од најголемите инвеститори во Македонија планира во наредните неколку месеци да вработи уште 200 лица, пред лансирањето на новата производствена линија која што планира да ја пушти во употреба во септември, со што бројот на вработени ќе достигна 600 лица.
Компанијата пред повеќе од еден месец распиша оглас за вработување на нови кадри. Тоа значи дека странските инвеститори, како резултат на поволностите за инвестирање кои ги дава Владата, полека но сигурно стануваат едни од најголемите работодавачи во државата.
Податоците на Заводот за статистика покажуваат дека најголем пораст на бројот на вработени во јуни, споредено со истиот месец минатата година има кај преработувачката индустрија и тоа за 8,7%, додека кај рударството зголемувањето е за 0,6%, а во секторот снабдување со електрична енергија, гас, пареа и климатизација опаѓање од 0,8%.
Бројот на работниците во индустријата во периодот јануари - јуни 2014 година, споредено со истиот период минатата година е поголем за 7%.
Почна изградбата на нова слободна зона во РадовишТехнолошко-индустриските развојни зони во државата се едни од најголемите дела на нашата генерација доколку се земат предвид сите досегашни инвестиции и новоотворени работни места во државата, а тоа е она што и треба на Македонија, истакна премиерот Никола Груевски на поставувањето камен-темелник на новата зона во Радовиш.
Владата за изградба на зоната ќе инвестира 11 милиони евра. Груевски подвлече дека последните услови што се нудат за зоните, инфраструктурата, но и нивната локација во близина на големите градови и на главните коридори, железнички пруги и аеродроми, претставуваат особено привлечна понуда за странскиот капитал.
Како што посочи премиерот, постојаните активности на Владата за привлекување нови инвеститори и отворање нови работни места веќе даваат резултати со оглед дека поголем број мултинационални компании веќе работат во Македонија, а голем број други се заинтересирани и се во интензивни разговори со владини претставници.
Место за уште четири нови инвеститори
Зоната ќе се протега на површина од 9,75 хектари со можност за нејзино идно проширување. Ќе располага со пет парцели од кои четири за производни капацитети и една за изградба на административна зграда. Со планскиот опфат на зоната се планира улична мрежа на водоводна и канализациска инфраструктура, телекомуникациска инфраструктура, како и мрежа за снабдување со електрична енергија и гас за фабриките кои тука ќе се градат.
http://www.vecer.mk/default.asp?ItemID=BB8F3B30A8E3854C8DD6B3CB71BF5B2E