Околу 81,2 проценти од енергијата од домашни извори
Во април, рекордно производство на домашна струја во Македонија
26 јуни 2015 - 15:57
Македонија во април годинава дури 81,2 проценти во бруто-домашната потрошувачка на електрична енергија ја обезбеди од домашно производство. Досега просечно во земјава околу 70% од потребите на струја се задоволуваат од домашни избори, а остатокот од увоз.
Инвестициите во енергетскиот сектор, особено во обновливи извори на енергија при што од сонце, ветер и вода се произведува електрична енергија веќе ги даваат првите резултати. Македонија во април годинава дури 81,2 проценти во бруто-домашната потрошувачка на електрична енергија ја обезбеди од домашно производство. Досега просечно во земјава околу 70% од потребите на струја се задоволуваат од домашни избори, а остатокот од увоз.
Покрај најголемиот производител на електрична енергија РЕК Битола со трите блока каде се произведува повеќе од 70 од вупната домашна енергија и големите хидроцентрали со учество од 20% во вкупниот колач, на контото на македонските енергетски капацитети се најдоа и 104 сончеви централи. Во производството на струја веќе повеќе од една година е вклучен и ветропаркот со 16 ветерници лоциран кај Богданци и годишно производство од 100 гигават-часови, како и 68 мали хидроцентрали.
На локацијата Ранавец кај Богданци работат 16 ветерници, а секоја од нив е со инсталирана моќност од 2.3 мегавати, а вкупната моќност е 36,8 мегавати. Лани преку искористување на благодетите на сонцето овозможено е да се произведат 16.813 киловат-часови електрична енергија.
Но за зголеменото производство на струја придонесе и добрата хидролошка состојба на акумулациите, но и ветропаркот Богданци исто така го надмина планираното произвоство. Значителни количини на струја од сончевите здраци светат во нашите домови.
Трендот на домашното производство од хироцентралите продолжува и овој месец и во вкупната произведена електрична енергија од домашни извори достигнува 25%.
Но и покрај тоа, најголемиот дел од производството во термоцентралите е од јаглен, бидејќи од вкупната потрошувачка на камен јаглен во земјава 97 проценти се употребени за производство на електрична енергија.
Зголеменото производство се должи и на тоа што изминатите години во земјава се инсталирани над 40 мегавати хидроенергија во мали хидроелектрани, 36 мегавати ветерни електрани и над 15 мегавати фотоволтаици. Но, во градба се уште околу 50 мегавати мали хидроелектрани или вкупно 130 мегавати снага, што е скоро колку хидроцентралите "Света Петка" и "Козјак" заедно.
За првите 4 месеци од годинава во ХЕЦ "Шпилје" се произведени околу 120 милиони киловат-часови електрична енергија, што е за десет отсто повеќе споредено со истиот период лани. Според надлежните, оствареното производство претставува 40 отсто од вкупниот план за 2015 година, кое согласно со енергетскиот биланс е над 300 милиони киловат-часови.
Зголеменото производство е резултат на поволната хидрологија на дебарското сливно подрачје, кое ги опфаќа реките Радика и Црн Дрим, како и навременото и успешно реализиреање на планираните ремонти и ревизии на електромашинската опрема.
ХЕЦ "Шпилје# која работи според потребите на енергетскиот систем во последните пет години во просек произведувала по над 250 милиони киловат-часови електрична енергија.
Македонија ќе добие уште 20 мегавати струја од обновливи извори на енергија, бидејќи ќе почнат да се градат 19 мали хидроцентрали. За таа цел Министерството за животна средина и просторно планирање потпиша договори со 12 концесионери за изградба кои треба да ги изградат овие хидроцентрали.
Истовремено уште 34 потпишани договори за концесија се во напредна фаза на обезбедување на потребните документи за добивање на одобренија за градба, со што ќе започне и изградбата на истите.
Државниот завод за статистика во континуитет на месечно ниво го анализира секторот Енергетика. Тие утврдиле дека во април годинава во земјава е потрошена 683.333 мегават-часови електрична енергија, 7.706 милиони нормални метри кубни природен гас, 546.021 тони јаглен и 85.416 тони нафтени продукти.
http://vecer.mk/ekonomija/vo-april-rekordno-proizvodstvo-na-domashna-struja-vo-makedonija
Во Пелагонија најмногу се произведува струја
Во Македонија за 3 години пуштени во употреба нови 84 енергетски капацитети
21 јуни 2015 - 14:29
Статистичките показатели само потврдуваат дека инвестициите во енергетскиот сектор, особено во обновливи извори на енергија вродија со плод и ги даваат очекуваните резултати.
Расте бројот на енергетските капацитети во Македонија кои се пуштени во употреба во периодот од 2012 година до 2014 година. Лани, доколку се спореди со 2012 година, бројот на енергетските објекти е побогат за нови 84 капацитети кои биле ставени во погон за изминативе три години.
Според статистиката, инсталирани капацитети за производство на електрична енергија во 2014 година биле 1.997 објекти, во 2013 година 1.038 објкти, а во 2012 година бројкатра се искачила на 1.913 капацитети.
Овие состојби во енергетиката се дел од новата публикација на Државниот завод за статистика насловена како Региони во Република Македонија која официјално е објавена на интернет страницата на оваа институција. Показателите само потврдуваат дека инвестициите во енергетскиот сектор, особено во обновливи извори на енергија вродија со плод и ги даваат очекуваните резултати.
Во 2014 година, најголем вкупен инсталиран капацитет за производство на
електрична енергија имало во пелагонискиот регион со вкупно инсталирана снага на
сите капацитети од 713 мегавати.
Порастот на инсталиран капацитет во југоисточниот регион се должи на
пуштањето во употреба на ветерните централи Ветропаркот "Богданци" кои започнаа со производство на втори април 2014 година. Во него се инвестирани 55,7 милиони евра и 16 ветерници со капацитет од 36,8 мегавати струја.
По региони лани во Вардарскиот регион имало 333 енергетски капацитети, во источниот регион 23 објекти, во југозападниот 266 енергетски објекти, југоисточниот -42, пелагониски регион - 713, полошки - 713, североисточниот само еден и во скопскиот регион се евидентирани 407 капацитети.
Статистичарите согледале дека потрошувачка на електрична енергија во индустриските сектори била најголема во 2011 година кога достигнала 2.693 гигават-часа. Во 2012 година потрошувачката била 2.365 гигават-часа и 2013 година таа постигнала 2.401 гигават-часа.
Потрошувачката на електрична енергија во индустриските сектори во 2013 година
беше најголема во вардарскиот регион со 35.5% и во полошкиот регион со 27.4%.
Дел од новите капацитети е и ХЕЦ "Света Петка". Хидроцентралата почна со работа на први август 2012 година, со што домашното производство на струја е зголемено за 66 гигават-часови. Овој енергетски објект за земјава е капитален енергетски проект и со нејзиното пуштање во погон целосно се заокружи водниот потенцијал на реката Треска.
Хидроцентралата е со инсталирана моќност од 36,4 мегавати, како и капацитет доволен за снабдување на преку 40.000 граѓани во земјава.
Производството на електрична енергија се зголемува и преку изградба на мали хидроцентрали. Тие се исто така дел од евидентираните објекти што се вклучени во статистичката анализа.
Според извори од ресорното министерство досега потпишани се вкупно 66 договори за концесија за вода за производство на електрична енергија со вкупно инсталиран капацитет од 60 мегавати и очекувано годишно производство од 230 гигават-часови.
Проценетата инвестиција се движи од 100 до 120 милиони евра, а од вкупниот број на потпишани договори за концесија, во моментот изградени се вкупно 17 мали хидроелектрични централи со инсталиран капацитет од 12 мегавати за кои досега се инвестирани над 20 милиони евра.
http://vecer.mk/ekonomija/vo-makedonija-za-3-godini-pushteni-vo-upotreba-novi-84-energetski-kapaciteti
Се почитуваат ЕУ директивите
РЕК Битола се модернизира, а во Осломеј наскоро ќе се стартува
22 јуни 2015 - 15:37
РЕК Битола е во процес на модернизација, при што се запазуваат сите потребни еколошки аспекти. Со тоа појавата на азотен оксид е сведена на минимум, односно е усогласена со ЕУ директивите.
Како што информираат од Електрани на Македонија наскоро ќе почне и процесот на десулфуризација на термоцентралата, при што РЕК Битола ќе работи и ќе произведува електрична енергија по сите европски стандарди.
Со европските директиви е предвидено и ТЕЦ "Осломеј" да се модернизира, за да ги задоволи технолошките норми зашто во спротивно нема да може да работи.
Како што објаснија експертите ТЕЦ "Осломеј" до 2018 година може да се снабдува од постојните наоѓалишта на лигнит, а по модернизацијата што треба да се направи по 2021 година да користи увозен јаглен кој што е повеќе калоричен.
На ова тема деновиве се произнесоа од Фондацијата "Мрежа за промени на Југоисточна Европа" кои посочија дека според директивите на ЕУ би требало да се реновираат или затворат 13 термоелектрани во Југоисточна Европа.
Според истражувањето во Македонија ќе бидат реновирани две термоелектрани, во спротивно меѓу 2025 и 2030 година термоелектраните Осломеј и РЕК Битола треба да бидат реновирани или затворени. Но енергетската компанија велат дека многу порано од овие рокови термоцентралите ќе бидат реновирани.
На ова истражување се најдоа и 4 термоелектрани на "Морава", "Костолац", "Никола Тесла" и "Колубара", кои треба во периодот меѓу 2025 и 2030 да бидат реновирани или затворени. Три блока од термоелектраната "Косово" треба да бидат затворени до 2020 година, а останатите два до 2025 година.
Во Босна и Херцегоивина во периодот меѓу 2020 и 2025 година треба да бидат затворени или реновирани четири блока на ТЕ "Тузла", а до 2030 година ТЕ "Гацко", "Угљевик" и "Какањ". На оваа листа се и Хрватска до 2020 година треба да го реши прашањето со ТЕ "Пломин", додека Црна Гора со ТЕ "Пљевља".
Енергијата е тема со која секоја земја на евроинтеграцискиот процес треба да се соочи и земјите од регионот би требало до 2050 година да ја намалат емисијата на штетни гасови за 80 проценти.
http://vecer.mk/ekonomija/rek-bitola-se-modernizira-a-vo-oslomej-naskoro-kje-se-startuva
ЕЛЕМ бара консултанти кои ќе анализираат кои се енергетските перспективи
И треба ли на Македонија нуклерка?!
23 јуни 2015 - 15:16
Електрани на Македоноија (ЕЛЕМ) распиша оглас за набавка на консултантски услуги за перспективите за примена на нови технологии, вклучувајќи и нуклеарна енергетика
Дали на Македонија и е потребна нуклеарна централа која ќе го реши проблемот со недостаток на електрична енергија којашто во моменто се задоволува од узоз е честа тема на дебатирање меѓу енергетските стручњаци во земјава.
Македонските академици сметаат дека во земјава треба да се гради нуклеарна централа. Тие анализирале и согледале дека по 2025 година ќе има реални услови за изградба на ваков капитален енергетски објект. Овие анализи се составен дел од веќе изготвената енергетската стратегија до 2020 година со визија до 2030 година.
Електрани на Македоноија (ЕЛЕМ) распиша оглас за набавка на консултански услуги за перспективите за примена на нови технологии, вклучувајќи и нуклеарна енергетика.
Од компанијата укажуваат дека проценета вредност на договорот без ДДВ е 1.200.000 денари. Огласот е отворен до пладне 30 јуни годинава.
Енергетските експерти велат дека ова само потврдува дека веќе се размислува за изградба на ваков енергетски капацитет и дека има основа да се реализира визијата која е дело на Истражувачкиот центар за енергетика, информатика и материјали ИЦЕИМ-при МАНУ.
Но изградба на ваков капацитет е скапа инвестиција, бара доста време за да се реализира, а неопходно е да се подготви и квалитетен стручен кадар. Проценките на експертите велат дека ни се потребни најмалку три милијарди евра инвестиции за да по 10 години да добиеме ваков нов енергетски капацитет.
Професорот и енергетски експерт Константин Димитров вели дека треба да се размислува на оваа тема оти се работи за чиста енергија која не ја загадува животната средина.
-Да, треба да се гледа преспективно за 15 години. Но во меѓувреме треба да се инвестира во кадар, да се следат новите технологии оти развојот во овој сектор брзо се движи. Се работи за инвестиција која зависно од капацитетот е од три до четири милијарди евра, па затоа е реално може да се оствари преку јавно-приватно партнерство - објасни професорот Димитров
Изградбата на нуклеарна централа би имало големо стратешко прашање, не само за нашата држава, туку и за регионот, бидејќи ваков капацитет економски е оправдан.
Заради големината на инвестицијата таа не може да се реализира, без вклучување на странските инвестициони банки.
Што се однесува за изградбата на нуклеарната централа можно е околу 20 проценти треба да имаме сопствено учество, а 80 проценти инвестиција од крупен странски инвеститор.
Како можна локација се наведува мариовскиот крај, бидејќи во тој регион на Црна Река се планира изградба на големите хироцентрали при што може да се користи истиот систем и за ладење на реакторите на нуклеарката.
Според податоците на Меѓународната агенција за енергетика, во светот постојат 372 нуклеарни централи со вкупно 440 реактори. Најмногу нуклеарки има во САД и тоа 106, потоа во Франција 63, во Јапонија 55, Русија 32, Германија 20, Канада 18, а во Кина 11.
Долгорочните прогнози на меѓународни ескперти, очекуваат до 2050 година во светот треба да се изградат околу 1.250 нови атомски електрани. Тоа значи дека до половината на овој век во светот треба да има над 1.700 атомски централи, што е четири пати повеќе од сега.
Според статистиката 15 проценти од светското производството на електрична енергија се добива од нуклеарна енергија, а 66 насто од нафта гас и камен јаглен, 17 проценти од хидроенергија и 2 отсто од сонце и ветер.
Дел од македонските граѓани се плашат од нуклеарната енергија
Пред неколку години "Брима галуп интернешнл" спроведе анкета меѓу македонските граѓани и тогаш против нуклеарна енергија се изјасниле 71 отсто од анкетираните Македонци, 19 проценти ја поддржуваат, а 10 отсто немаат изградено мислење за тоа.
Од анализата се согледува дека мнозинството граѓани на Македонија се против употреба на нуклеарна енергија. Анкетата беше реализирана по катастрофалниот земјотрес и цунамито во Јапонија, и истекувањето радиоактивно зрачење од нуклеарната централа Фукушима.
http://vecer.mk/ekonomija/i-treba-li-na-makedonija-nuklerka
