Кавадарчани веќе не прифаќаат работа под 10.000 денари
Надлежните оценуваат дека Кавадарци како општина во моментов е меѓу најдобрите во земјава кога станува збор за број на вработени
Откако Кавадарци од град на грозјето, виното и никелот, прерасна и во град на автомобилската индустрија, со отворањето на германската „Дрекслмаер“, се раздвижи и пазарот на труд. Голема е конкуренцијата, се намалува невработеноста, а растат и платите.
За време на гроздоберот речиси и немаше слободен работник, кој за дневница од 1.000 денари ќе биде ангажиран како аргат во бербата на грозјето. Се' помалку има млади за работа во продавници, во бутици и кафулиња. Подобрен е стандардот на граѓаните, велат и трговците. Ваква перцепција имаат и институциите, но граѓаните велат дека платите се' уште не се на ниво да ги покријат трошоците.
Надлежните институции оценуваат дека Кавадарци како општина во моментот е меѓу најдобрите во земјава кога станува збор за број на вработени.
„За среќа, бројот на вработени во Кавадарци е солиден и е на европско ниво. Покрај стимулативните мерки за странските инвестиции, мислам дека државата прави еден потег кој е за поздравување и има за цел да имаме вработување плус, токму преку активните мерки и политики кои им се на располагање на домашните работодавци“, вели градоначалникот на Кавадарци, Александар Панов.
Од приватните агенции за привремени вработувања велат дека во Кавадарци многу тешко се прифаќа работа на црно од општите работници и никој не сакал да работи за плата пониска од 10.000 денари.
„Пред неколку години се случуваше истите тие работници да прифатат и плата од 100 евра без социјално осигурување. Благодарение на ’Дрекслмаер‘ веќе никој во Кавадарци не прифаќа работа на црно. Дури и за 10.000 денари месечна плата, неквалификуваните работници не прифаќаат да работат. Минималната плата во земјава ќе достигне над 10.000 денари во 2016-2017 година, а во Кавадарци и регионот веќе таа е реалност во 2014 година“, вели Светлана Арсова од Агенција за привремени вработувања „Партнер“, која деновиве учествуваше во едукацијата на професорите од средните училишта кои имаат обврска да ги едуцираат своите ученици како да одбијат работа на црно. Таа нагласи дека секојдневно контактирале со фирмите во градот со цел да ги потсетат дека сите работници треба да бидат пријавени, бидејќи многу често се правеле злоупотреби од работодавците со привремените вработувања.
„Најчестите злоупотреби во врска со сивата економија се случуваат со привремените вработувања. Работодавците многу често не ги пријавуваат ваквите работници, но со тоа најмногу се оштетени токму луѓето кои се на привремена работа. Не се знае дали во тој период на привремено вработување може се јави потреба да се користи боледување, годишен одмор или која било привилегија што му следува на секој работник“, нагласува Арсова.
Покрај директните вработувања во „Дрекслмаер“ и останатите компании кои работат во Кавадарци, голем е бројот и на лица кои ја напуштија Агенцијата за вработување и од активни баратели на работа преку кредитирање си обезбедија самовработување.
„Откога се почнати мерките за поддршка во вработувањето од 2007 година досега има околу 1.500 вработувања во Кавадарци. Тоа не значи дека се само 1.500 вработувања, бидејќи едно лице кое зело кредит за самовработување има 15 вработувања во својот бизнис, па така имаме 3.000 активни вработувања кои денеска функционираат и во голема мера е подобрена состојбата со невработеноста во општината. Сметаме дека сме една од најдобрите општини во однос на вработувањето, односно со најмал број на невработени. Со обуките и преквалификациите доаѓаме да нема доволно стручен кадар да ги следат овие мерки, да можат да бидат понатаму конкурентни на пазарот и да бидат активно вработени“, вели раководителот на АВРМ Кавадарци, Благој Борисов.
Деновиве во Кавадарци беше одржан и форум на работодавци на кој беа претставени сите мерки кои во моментот ги презема и ги нуди државата за вработување на младите лица. Форумот беше организиран од Општина Кавадарци со Министерството за труд и социјална политика, Националниот совет за претприемаштво и конкурентност, Агенцијата за вработување и УНДП. Се дискутираше за искуствата од досегашната примена и идентификувањето на проблемите и потребите на бизнис-заедницата во насока на јакнење на соработката во планирање и имплементирање на политиките за вработување на локално ниво.
http://www.utrinski.mk/default.asp?ItemID=4E82FAA8521448469EBF745BF2258DE0#.VDzf5sR12l4.facebook