Текстов можеби не е за тука, надлежните нека префрлат каде мислат дека треба.
Но вреди да се прочита.
МАГИСТЕР ПО ПРАВНИ НАУKИ ПРОИЗВЕДУВА БИОДИЗЕЛ
ПРЕГОРЕНО МАСЛО НАМЕСТО ВО ОДВОД, КАКО ПОГОНСКО ГОРИВО
Магистерот по правни науки, дваесет и осумгодишниот Александар Димитриевски, своите дипломи ги остави во фиока и реши да се посвети на приватен бизнис и тоа на нешто што нема никаква врска со она за што се школувал - производство на биодизел, и тоа од прегорено масло кое како отпад се фрла во мијалниците и во тоалетите.
На излезот од скопската населба Радишани, во месноста Бел Kамен, тој и неговиот две години постар брат Жарко, кој е машински техничар, направија мал капацитет во кој веќе неколку месеци произведуваат гориво, кое се смета за едно од најнезагадувачките. Ова гориво без проблеми го користат во своите возила, но и го продаваат, засега најмногу на камионски превозници, но и на други фирми.
- Идејата да произведуваме биодизел ја добивме пред една година следејќи ги информациите од другите земји каде што има многу производители на биодизел, кое е алтернативно гориво и не ја загадува животната средина како фосилните горива. Ваквото гориво има 0,03 отсто загадување, не е канцерогено и штетно, односно дури и солта е поштетна за здравјето од биогоривото - вели Димитриевски.
Опремата што ја имаат браќата во својата работилница е набавена, како што објаснуваат делумно од соседна Србија, а делумно и од други земји. Со процес на вриење се добива хемиска реакција, со која се одвојува биодизелот, а на дното останува талогот. Горивото на клиентите им го испорачуваат во контејнери, а талогот засега го складираат.
- Во развиени земји талогот што се добива со производство на биогоривото се користи во индустријата за производство на течни сапуни, а и во козметиката. Kај нас с` уште нема некое вакво производство, иако имаше најави дека во околината на Струмица ќе се отвора таков капацитет. Засега талогот го складираме, па можеби, кога ќе имаме поголеми количини, ако кај нас нема каде да се пласира, ќе го извеземе - објаснува Димитриевски.
Суровината за производство е „отпадот“ од кафеаните и од сендвичарниците, кои претходно прегореното масло го фрлале најчесто во одводите, од што тие многу често и се затнуваат и создаваат проблеми. И, секако, ја загадуваат животната средина бидејќи еден литар прегорен зејтин загадува 1.000 литри вода. Сега на приближно 150 вакви угостителски објекти, со кои имаат договори, им се оставаат канистери во кои тие го собираат искористеното масло, а браќата потоа го собираат и го рециклираат во својот погон.
- Пред да почнеме со производството регистриравме фирма „Метил естер“, што е во суштина латинско име на биодизелот. Јас бев девет месеци на обука и положив за управител на отпад бидејќи маслото што се собира е отпад и има правила како со него да се ракува и како да се складира. Од Здружението „Цепросард“ ни помогнаа во изработка на потребниот елаборат за заштита на животната средина, кој беше неопходен за да ја добиеме потребната дозвола од Министерството за животна средина и почнавме со работа, која засега оди добро. Односно, преработуваме толку колку што ќе собереме прегорено масло - вели Димитриевски.
Kапацитетот за производство им е поголем од она што сега го преработуваат и за да го зголемат, планираат да воспостават соработка со некои од фирмите кои исто така собираат прегорено масло, но го извезуваат бидејќи така домашните ресурси би останале во земјата.
Биодизелот, кој го произведуваат, како што велат, може да го користат сите возила произведени до 2006 година, без притоа да додаваат фосилни горива. За поновите возила произведени по оваа година мора да се изврши мешање. Ваквото гориво е одлично и за користење во земјоделската механизација. Со користење на биодизелот, според Димитриевски, потрошувачката на гориво е помала за 30 отсто во споредба со фосилното гориво. А она што го продаваат во оваа мала фирма, како што велат, е за 10 денари поевтино отколку на бензинските пумпи, па затоа и побарувачката станува с` поголема.
Биодизел од листовите од паловнија
За разлика од процесот на добивање биодизел од отпадно масло, тоа може да се добива од земјоделски производи, односно од маслодајни растенија. Може да се користат сончоглед, маслодајна репка или соја, но и палмино масло и други видови вакви растенија, а кое растение ќе се користи зависи од поднебјето. Па, така, ако, на пример, во Европа се користат стандардните маслодајни култури - сончоглед и репка, во САД најмногу се користи соја, а во Индонезија - палмино масло.
Димитриески планира да проба да добива масло од листовите на брзорастечкото дрво паловнија за кое се тврди дека има голема концентрација на масло, кое се истиснува со пресирање. Затоа има засадено 200 садници од ова дрво, чии листови планира да ги користи за биодизел, а дрвената маса како дрво за огрев, за добивање брикети или за извоз.
Еколошко гориво
Со користење биодизел се намалува емисијата на гасови и се избегнува ефектот на стаклена градина. Тоа не испушта јаглероден диоксид, во себе не содржи сулфур, олово, ниту азотни соединенија. Подобро согорува во моторот, а со неговото користење се намалува загадувањето на воздухот и на водата дури за 300 пати бидејќи е биолошки разградлив.
Испитувањата покажаа дека дизел-мотори со погон на биодизел имаат за 40 отсто помала емисија на чад и честички, а пониска емисија се постигнува и кога се прави мешавина од биодизел и фосилни горива. Kористењето на ова гориво особено се препорачува на места каде што е неопходна мала емисија на штетни гасови, како пластеници, рудници или национални паркови.
http://www.dnevnik.mk/default.asp?ItemID=D9AC3F64A16BEF429C18E1E446D4F4ED