Поради многубројните обврски и стресниот начин на живеење, во просек спиеме час и половина помалку отколку порано, па се поголем е бројот на луѓе кои се жалат на несоница или лош сон.
Имајќи во предвид дека траењето и квалитетот на сонот влијаат на се што правиме во текот на денот, непреспиените ноќи најпрво треба да се победат со менување на животните навики.
Недостатокот на сон може да има влијание врз душевните пореметувања, нарушеното здравје и конзумирањето на одредени лекови. Бројните истражувања покажуваат дека премалата количина на сон го зголемува ризикот од болестите на срцето и крвните садови, доведува до пореметување на телесната тежина, а со тек на време и до депресија. Докажано е и дека лошиот сон предизвикува деконцентрација на работното место, ја зголемува нетрпеливоста кон претпоставените, а може и да биде причина за една непосакувана дремка на работното место.
Токму затоа, потребно е да се пронајдат и елиминираат причините за неквалитетниот сон - најчесто, тоа се лошиот душек или перница, претоплата соба, партнер кој грчи, вревата од улица, уличното осветлување или сјајните билборди чија светлина стигнува до вашата спална соба, активноста на безчуствителните соседи...
Хроничната несоница настапува кога сонот се мери се на се во неколку часа дневно (или потполно изостанува), односно кога тоа пореметување трае во подолг временски период. Апчињата за спиење се последното решение на проблемот, бидејќи нудат само краткотрајна помош - која мора да се користи исклучиво под надзор на медицинско лице. Доколку било што конзумирате "на своја рака", преферирајте тоа да биде некој чај или благи природни препарати.
Стрес и трауми
Имате стресна и исцрпувачка работа, а не сте во состојба навечер да легнете, да се опуштите и заспиете? Тоа значи дека сте изложени на прекумерен стрес - односно, вашиот мозок работи неконтролирано и не е во состојба да се смири.
Треба да се знае дека "пренапрегнатиот" мозок не работи како склопка која во еден момент може да се префли во друга состојба на работа. За да го спречите фокусирањето на мозокот на една единствена работа, подгответе план на дневни активности кон кој строго ќе се држите. Мора да знаете кога станувате од спиење, кога сте посветени на одредена активност, кога јадете, кога легнувате на спиење..Помеѓу активностите, 3 до 5 пати дневно одредете период меѓу 10 и 20 минути за медитација или било која друга техника која ќе ви помогне да се опуштите.
Доколку причините за вашата несоница се трауми како смрт на блиски личности, неочекувано губење на работното место, развод или прекин на долга врска, како и ред други слични ситуации, обратете се кај вашите блиски или кај стручни лица кои можат да ви понудат помош. Покрај ова, може да помогне и креирање на план на дневни активности кои вас плански ќе ве оттргнуваат од размислувањата за конкретната траума.
ПОМОШ ВО БОРБАТА СО НЕСОНИЦАТА
Телесна активност
Се препорачува телесната активност како секојдневното вежбање во теретана или некоја друга форма на физичка активност, бидејќи уморното тело полесно ќе заспие, дури и кога умот е преоптеретен.
Прехрана
Обилните оброци, особено масните порции храна се голем непријател на мирниот сон, исто како и гладувањето. Многу луѓе кои практикуваат одредена диета, не јадат после 18 часот, што не е препорачливо, доколку страдате од несоница. Најдоцна 2 часа пред да заминете "под јорган планина" лапнете некој лесен оброк и избегнувајте ги смртните непријатели на добриот сон како кофеинот, алкохолот и цигарите, но и силно зачинетата (лута или солена) храна и чоколадото. За кофеинот, конкретно, се препорачува да не се конзумира и до 8 часа пред спиење.
Распоред на дневни активности
Кај секое пореметување на сонот клучно е да се воспостави ред во дневните активности, а тоа значи секојдневно да се легнува и станува во исто време (подобро порано, отколку подоцна). Ноќните птици нека примат на знаење дека легнувањето во кревет во 3 часот наутро е одличен темел за добра несоница, посебно доколку неколку пати пред тоа заспале и се разбудиле покрај телевизорот. Научниците ги прифаќаат разликите во биоритмот, но во одредени граници: прифатливо е да се заспие меѓу 22 и 01 после полноќ.
Услови во спалната соба
Освен отстранувањето на попречувачите на сонот и набавувањето на квалитетен душек и перница, во спалната соба е препорачливо да одржувате температура за некој степен пониска во споредба со останатите простории во станот. Избегнувајте ги долгите разговори на мобилниот пред да заспиете, а имајте во предвид дека телевизорот и компјутерот се уште едни во редот на попречувачи на сонот, и како такви не смеат да се наоѓаат во спалната соба.
Пред заспивање добро проветрете ја собата, а откако ќе легнете обидете се да заборавите на дневните грижи, фантазирајте за убави работи, замислувајте си слики на море и плажа, или било што што ќе ве опушти, медитирајте... Читањето на книги, шоља какао или топло млеко, или пак пријатна купка во бањата ќе ви помогнат да се ослободите од насобраниот стрес после што, така, опуштени ќе втоните во длабок сон.
Доколку ништо од наведеното не ви помага и ви се чини дека несоницата е се полоша и полоша, консултирајте го вашиот доктор.
