1. Го вариш оризот. Е сега секој си има посебен начин како си го вари. Јас варам басмати на следниов начин во сооднос 2:1 (вода:ориз). Ставам во тенџерче да зоврие вода покриено со капак. Откако зоврие убаво, го ставам оризот. Намалувам на тихо, и оставам да врие точно десет минути. Не го мешам, не го растресувам, не го чепкам. Тоа е важно за да не загори. Ако го чепкаш, мешаш, промешуваш, големи се шансите да се залепи за дното. После десетте минути, го тргам настрана и го оставам 15 минути да си ја впие водата, покриен. Пред да го размешаш со останатото, откриваш и размешуваш.
Паралелно со другото.
Во тава запржуваш пршута и шунка со сецкано лукче (не претерувај со месото, околу 200 грама за две лица е повеќе од доволно). После ги додаваш останатите зеленчуци (грашок, морков, свежо кромитче, печурки, може и пиперка), ставаш бело винце од око (барем јас така ставив) околу 100ина мл, посолуваш, покриваш со капак, намалуваш температура и чекаш да проврие едно пет минути. Јас не го вријам многу затоа што сакам зеленчукот малце да ми ропка и да си ја има свежината.
На крај, оризот го мешам со тоа во тавата, и го оставам да отстои откриен 4-5 минути (така дел од течноста ќе ја впие оризот) а дел ќе испари од толлината. Јас го послужив со свеж магданос, шприцер од ризлинг, обогатен со свежо исцеден сок од лимон.
Накратко, супер лесно јадење, многу вкусно, ароматично. Таман за жештините.